Копирайтер тек мәтін жазушы ғана емес. Ол тұтынушыларға пайдалы контент ұсынып, қалауын қанағаттандыруы тиіс. Тіпті білім беріп, оқырманның көңілін көтеруі де мүмкін. Жақсы контент магнит іспеттті. Ал клиенттердің компасы сізді нұсқайтын болады. Balbal.kz копирайтерге жақсы мәтін жазуға көмектесеті кеңестерді дайындады.
Маңыздыны жазу
Бастысы – адамдарды қызықтыратын тақырыпты таңдау. Бұл бәрін толғандыратын мәселе болуы мүмкін. Алайда оқырманды әлемдік проблема қызықтырмайды. Оған өзінің басынан өткен, күнделікті соқтығысатын мәселелердің шешімін іздеген маңызды. Демек сіз ізкесушінің қызметін атқарасыз. Маңызды тақырыпты іздеп, бәріне түсінікті тілде ұсынуыңыз керек.
Тақырыптан ауытқымау
Мәтін жазу барысында мың түрлі ой келеді. Барлығы тақырыпқа қатысты секілді. Егер бұларға ере берсеңіз, мәтіннің мәні жоғалады. Барынша тақырыптан ауытқымай, оны одан әрі дамыта түсіңіз. Мәтіндегі ойға қатысты мысалдар келтіріңіз.
Маркетолог Райан Бокрос: «Контент белгілі тақырыпқа байланысты болуы шарт. Бірнеше тақырыптың басын қосып, бір уақытта қамтимын деу – қателік. Кәсіпқой копирайтер көлемі шағын, нақты тақырыпты таңдайды. Бұл оқырманды ұзағырақ ұстап қалуға көмектеседі».
Өзгелердің пікірін қосуды ұмытпаңыз
Мақала және ұсынып отырған контентті осы саланың маманының пікіріне сүйене отырып жазған жөн. Мұндай адамдардың ойын білу сіздің 5 минутыңызды алады. Телефонмен сөйлесіп немесе пошта арқылы хат алмасыңыз.
Сөзді аямау керек
Мәтінді жазу барысында барлығын толық қамтыңыз. Қарапайым тілмен, қысқа сөйлемдер арқылы егжей-тегжейлі баяндаңыз. Тақырып ашыла түсуі үшін суреттер мен инфографиканы да қосыңыз. Оқырман бір оқып не айтқыңыз келгенін түсінуі қажет.
«Los Angeles Times» газетінің маманы бұған қатысты былай пікір білдіреді: «Әр мақаланың басында негізгі ой баяндалады. Әрі қарай суреттердің көмегімен тақырып ашылады. Әр суреттің сипаттамасы болуы керек. Бұл оқырманның мақаланы соңына дейін оқуына септігін тигізеді».
Ашық әңгіме құру
Жақсы контент – тек ақпарат блогы емес. Бұл – әңгіме, сұхбат, сұрақ-жауап. Егер оқырман мәтінді оқи отырып, дәл өзіне айтылғанын сезінсе, онда жеңіске жеткеніңіз. Адамдармен байланыс орнатқыңыз келсе, олардың тілін табыңыз.
Мол ақпарат беру
Әр оқырман сіздің контентіңізден өзіне пайдалы ақпарат іздейді. Оларға қызықты мәліметтер мен деректерді дайындаңыз. Бұл үшін аудиторияны зерттеп алған жөн. Әр мәтінді жазбас бұрын өзіңізден «Менің оқырмандарыма қызықты бола ма?» деп сұраңыз.
