Байлықтан бас тартқан миллионерлер бұл шешімдеріне еш өкінбейді. Олар жинаған қаражаттарын өз пайдаларына жұмсамай, қайырымдылыққа жұмсаған. Balbal.kz мотивациялық сайты байлықтан бас тартқан миллионерлердің өмірінен мотивация алуға шақырады.
Чарльз Финни
Чарльз Финни – Duty Free компаниясының негізін салушы. Ол үстіне ақша қоспай, тауарларды өз бағасымен сатуымен ерекшеленді. Чарльз әлемге бизнесмен ретінде емес, филантроп ретінде танымал. Ол өзінің бар байлығын қайырымдылыққа өткізген алғашқы бизнесмен. Қайырымдылыққа жұмсаған қаражаты 8 миллиард долларды құрады.
Чарльз жағдайы жақсы болса да, қарапайым өмір салтын ұстанды. Анонимді түрде көмек беріп, жалдамалы пәтерде тұрды. Көліксіз жүрді. Ұшақ билетін тек эконом класстан алды.
Никола Тесла
ХХІ ғасырға үлкен үлес қосқан өнертапқыш ғалым. Тесла әлемдегі ең бай атанар еді, бірақ оның айналасында арам ойлы адамдар көп болды. Тесла жиі алданып, еңбегі ақталмай жүрді. Соған қарамастан ісін тоқтатпай, нәтижесінде оның туындыларын бағалаған демеушілер табылды. Көп еңбегі паттентелді. Тесланы ақша қызықтырмады. Тек жан рақаты үшін ғылымды тоқтатпады.
Никола ешқашан отбасы құрмаған. Ол романтикалық қарым-қатынас оның ғылыми жұмысына кері әсерін тигізеді деп ойлаған. Оның өзінің тұратын үйі болмады. Лабораториялық бөлмелерде түнеп, қартайған шағында қонақ үйлерді аралап жүрді.
Никола Тесла 86 жасында дүниеден озды. Оның отельдегі бөлме есігінде «Мазаламаңыз» деген тақтайша тұратын. Сол себепті оның денесін екі күннен кейін ғана тапқан. Отель номері төленбей қалғаны үшін оның жеке заттарының бәрі аукционда сатылды. Осындай құнды деректер мен жазбаларды кітап сатушы не бары 25 долларға сатып алған.
Том Шедьяк
Кинорежиссёр Том Джим Керри мен Эдди Мерфидің танылуына ықпал етті. Оның «Өтірікші», «Алжыған профессор», «Эйс Вентура: үй жануарларын іздеу», «Құдыретті Брюс» атты фильмдері бар.
Томда бәрі болды: сүйікті ісі, керемет табыс мөлшері, атақ-даңқ. Алайда 2007 жылы режиссер кенеттен жоғалып кетіп, бірнеше жылдан кейін қайта оралды. Ол «Мен бармын» деректі фильмінде өз өмірбаянын көрсете отырып, әлемдік мәселелерді қозғады. Өз фильмінде ғалымдар, дін өкілдері, философ және экологтарға сұрақ қояды.
Өмірінің бұлай өзгеруіне велосипедпен болған апат әсер еткен. Осы оқиғадан кейін мүлігінің бірнеше бөлігін сатып, қайырымдылыққа өткізді. Жағдайы нашар жандарға баспана салумен айналысып, киноиндустрия саласынан алшақтады. Қазіргі таңда Шедьяк университетте сабақ береді және өз шешіміне өкінбейді.
Ю Пеннянь
Ю Пеннянь жылжымайтын мүлік саласын дамытқан қытайлық бизнесмен. Ю негізі кедей отбасыдан шыққан, Шанхайда рикшамен зат тиеді. Еден жуушы және құрылысшы болып нәпақасын тапқан. Басында акция дұрыс салмай, бар мүлкінен айырылған. Кейіннен айы оңынан туып, Қытайдағы дәулетті отбасылардың қатарында болды.
Пеннянь оның тағдырын балалары да бастан кешіргенін қалайды. Оның пікірінше оңай ақша адамды бұзады. Отбасы бюджетін азайту үшін қайырымдылық қорын ашты. Қор денсаулық сақтау, білім беру салаларын, табиғи апаттан болған зардаптарды қалпына келтіру шараларын қаржыландырады. Сонымен қатар бизнесмен катаракта ауруына шалдыққан 150 мыңнан аса адамдардың операцияларын төлеп берген. Себебі кезінде өзі де сол аурудан қиналған екен. Өз өмірінде Пеннянь 8,2 миллиард юань (1 миллиардтан аса) қаражатты қайырымдылыққа жұмсаған.
Дмитрий Зимин
1991 жылы Дмитрий Зимин Мәскеу радиотехникалық институтында техникалық сарапшылардан бір топ құрып, ұялы телефон байланысын дамытуды қолға алды. Бір жылдан соң «Вымпел-Коммуникации» атты компания құрылып, «Билайн» сауда маркетімен танымал болды.
Тоғыз жылдан кейін клиент саны бір миллионнан асқан соң Дмитрий қызметін босатты. 2002 жылдан бастап «Династия» қорын ашып, табысының көп бөлігін аударды. Қордағы қаражат Ресейдің іргелі ғылымының дамуына жіберілді.
2015 жылы Дмитрий Ресейден көшіп, «Zilim Foundation» атты әлемдік коммерциялық емес ұйым ашты. Енді қор Ресей ғылымын емес, әлемнің түрлі елдерін де қаржыландырды.
Перси Росс
Перси Росстың әкесі көне бұйымдарды өңдеумен айналысатын болған. Бұл тек олардың күнкөрісін ғана қанағаттандырды.
1959 жылы Перси құрдымға кеткен пластикалық пакет шығаратын компанияны сатып алды. Сол істі жандандырып, нәтижеге жетті.
1977 жылдан бастап қайырымдылықпен айналысуды жөн көрді. Жаңа жылға 1000 велосипед сатып алып, балаларға таратқан. Кейін жергілікті шеруде кездестірген әр адамға 20 000 доллардан берді. Бірнеше уақыттан соң «Миллион алғыс» атты газетте 17 жыл бойы өзінің жеке бөлімі болған. Сол бөлімде адамдар Росстан көмек сұрады. Соңғы бөлім 1999 жылы шықты. Онда Росс бар ақшасын таратып бітіргенін, жалпы 30 миллион доллардан аса қаражат жұмсағанын мәлімдеді.
Зелл Кравински
Зелл Кравински тек табысын беріп қоймай, өз бүйрегін де қайырымдылыққа өткізген адам. Ол алғашында жылжымайтын мүліктермен айналысты. Сол бизнесінен 45 миллион долларды қайырымдылыққа аударды. Кейін кедей мемлекеттерде трансплантация мәселесі өршіп тұрғанын білген соң өз бүйрегін беруге келіседі.
Фране Селак
Фране Селак хорватиялық музыка пәнінің мұғалімі. 2002 жылы лотереядан 1 миллион доллар ұтып алды. Екі үй және жеке қайық сатып алды. Алайда кейінірек ақшаның бақыт әкелмейтінін түсініп, ақшаны туыстары мен таныстарына таратып берді.
Дайындаған: Қырмызы Скендирова
