Таным

Ұйқыңыз тыныш болсын десеңіз

Ұйқыңыз нашар ма?

Ұйқыңыз тәтті болуы үшін өнертапқыштар бірнеше пайдалы мобильді қосымшаларды шығарды. Олар сізге қай уақытта және қанша уақыт ұйықтау керек екендігін еске салып отырады. Ал біз сізге практика жүзінде дәлелденген ұйқыға арналған кеңестер тізімін ұсынамыз. Бұлар жайлы белгілі невролог Хуан-Хосе Ортега «La Vaguradia» газетіне берген сұхбатында айтқан.

Ұйқының пайдасы қандай?

Жақсы ұйқы адамды барлық физикалық ауыртпалықтардан арылтады. Бет түсінің қалыпты болуын қамтамасыз етіп, жақсы көңіл күй сыйлайды. Сау ұйқыдан соң адамның қозғалысы ширақ болады.

Зерттеу нәтижесі бойынша ұйқысы қанбайтын адамдардың жиі ауруға шалдығатыны белгілі болды.

Ал жұмыс уақытын көбіне отырып өткізетін жандарға ұйқының шала болуы қатты әсер етеді екен. Осындай жағдайға тап болмау үшін мамандардың кеңесіне құлақ асқан дұрыс.

Ұйқы гигиенасын ұмытпаңыз

Біздің денеміз ұйқыға бізден бұрын дайындалады. Алдымен ұйқыға қажетті гормондар бөлінеді. Қараңғы түскеннен кейін дене температурасы төмендеп, таңғы уақытта 35 градусқа дейін жетеді. Ал кешкі уақыттан бастап мелатонин бөлінеді. Ол өз шегіне гормон бөлініп бастаған уақыттан кейін 3-4 сағатта жетеді.

Ұйқы гигиенасы дегеніміз – тәтті әрі сау ұйқыға кепілдік беретін бірнеше пайдалы әдеттер.

— Ұйқы графигін ұстануды ұмытпаңыз. Күнделікті бір уақытта ұйықтап, бір уақытта оянған дұрыс.
— Ұйқы алдында қатты тойып тамақ ішпеңіз. Тамақтануды ұйықтауға 2 сағат қалғанда тоқтатқан дұрыс. Сонымен бірге ұйықтар алдында кофе, шәй және алкогольдік ішімдіктерді ішудің қажеті жоқ.
— Түнде ұйқының бұзылмауы үшін сұйықтықты азырақ тұтыныңыз.
— Ұйықтайтын бөлмеде ақ және көкшіл түсті шамдардың болмағаны дұрыс. Бұл мелатониннің бөлінуін баяулатады.
— Ұйықтар алдында экран алдында ұзақ отырудың қажеті жоқ. Бұл теледидар, ноутбук тіпті планшет болсын.
— Физикалық жаттығуларды күннің алғашқы бөлігінде жасаған дұрыс. Жаттығу кезінде дене температурасы жоғарылап, зат алмасу жылдамдай түседі. Ал бұл ұйқымен үйлесім таппайды.
— Ұйықтар алдында жұмыспен қатыстының барлығын ұмытыңыз. Бұл сіздің жақсы тынығуыңызға әсер етеді.
— Терезені перде немесе жалюзимен жауып қойыңыз. Мелатониннің бөлінуіне сырттан келетін жарық әсер етпеуі тиіс.
— Ұйқы кезіндегі ұсынылатын бөлме температурасы 18-ден 21-ге дейін.
— Төсек тым жұмсақ болмауы керек. Тым биік және тым аласа болмағаны дұрыс. Жастықтың да тым жұмсақ болмағаны жөн.

Дайындаған: Назархан Уән

Тег
Көбірек көру

Оқи отырыңыз

Close

Тегін бизнес консалтинг

Balbal.kz материалдарын email-ға жіберіп отырамыз. Тек сала/тақырып таңдап әр 5 күн сайын e-mail-ды тексеруді ұмытпаңыз!